Бу дьыл алтынньы 30 күнүгэр оройуоннааҕы кииннэммит библиотека көҕүлээһининэн, «Үлэ сылын» чэрчитинэн Усуйаана улууһун Ытык олохтооҕо, ССРС өҥнөөх металлургия бочуоттаах горняга, Социалистическай Үлэ Геройа Прокопий Иннокентьевич Быканов төрөөбүтэ 85 сылыгар аналлаах «Туругурда туруоҕуҥ хорсун үлэ киһитин!» диэн ааттаах төгүрүк остуол тула дьон-сэргэ ахтыы дьоро күнүгэр муһунна.
Прокопий Иннокентьевич Быканов 1938 сыллаахха алтынньы 27 күнүгэр Халбаакы нэһилиэгин Тыымпы алааһыгар күн сирин көрбүтэ.
Прокопий Иннокентьевич үлэтэ-хамнаһа холхуостан саҕаламмыта. Сэбиэскэй Аармыйа кэккэтигэр сулууспалаан баран 1962 сыллаахха Дьокуускай куоракка тыа хаһаайыстыбатын механизацияҕа оскуолатын үөрэнэн бүтэрэн «киэҥ профиллаах тракторист-машинист» идэтин ылбыта. Үөһээ Халымаҕа, ол кэннэ 1967 сыллаахха Усуйаана оройуонун «Силээннээх» сопхуоһугар, онтон 1974 сыллаахха «Депутатскай» бириискэтигэр ананан бэрт таһаарыылаахтык үлэлээбитэ. Хоһуун үлэһити бэлиэтии көрөннөр «Киин» карьерга бульдозеристарга биригэдьииринэн аныыллар. Кини салайар биригээдэтэ өрө күүрүүлээхтик үлэлээн, ирбэт тоҥ усулуобуйатыгар оччотооҕу бульдозер курдук саҥа техниканы баһылыырга араас технологиялары, албастары туһанан үрдүк көрдөрүүлэри ситиспитэ, инники күөҥҥэ сылдьыбыта.
Кини Усуйаана курдук уһук хоту сытар оройуоҥҥа хайаны байытар комбинакка үлэлээн бочуоттаах сынньалаҥҥа барыар диэри уопсайа 23 сыл устата бэриниилээхтик үлэлээбитэ.
ССРС Үрдүкү Сүбэтин 1985 сыл тохсунньу 15 күнүнээҕи Ыйааҕынан Прокопий Иннокентьевич Быкановка Социалистическай Үлэ Геройун аата иҥэриллибитэ уонна Ленин уордьанынан наҕараадаламмыта.
Бу күн буолбут дьаһал «Герой Быканов» диэн суруйааччы Андрей Кривошапкин хоһоонун музыка доҕуһуоллаах ааҕыынан саҕаланна. Салгыы ыалдьыттар Геройга аналлаах кинигэ-быыстапканы, презентацияны көрөннөр сэргээтилэр. Быйылгы дьыллаахха «Саха сирэ кинилэринэн киэн туттар» сериянан тахсыбыт Прокопий Иннокентьевич дьоһун олоҕун оҥкулларын, килбиэннээх үлэтин ситиһиилэрин туһунан ааҕааччы киэҥ араҥатыгар кэпсиир саҥа буруолуу сылдьар кинигэни кытта билистилэр. Маны таһынан кини төрөппүт кыыһа суруйбут хоһоонун иһиттилэр. Мустубут дьон Прокопий Иннокентьевиһы олус истиҥник ахтан-санаан аастылар, ыччакка аналлаах элбэх кэскиллээх тыллары эттилэр.
Кини дьоһун олоҕо, бэриниилээх хорсун үлэтэ куруук умнуллубакка эдэр ыччакка холобур буола турдун!
