Ааспыт күннэргэ Депутатскай бөһүөлэгэр Олоҥхо декадата буолан ааста. Декада чэрчитинэн «Олоҥхо дойдутунан айан» диэн ааттаан олохтоох библиотека тэрийиитинэн саха литературатын төрүттэспит улуу суруйааччыбыт Платон Алексеевич Ойуунускай төрөөбүтэ 130 сылын, ону тэҥэ хомус күнүн бэлиэтэннэ.Бу күн манна кэлэн ыалдьыттаатылар уонна кытыннылар: Евдокия Васильева салайааччылаах Депутатскайдааҕы музыка уонна искусство оскуолатын фольклор салаатын үөрэнээччилэрэ, Депутатскайдааҕы инвалидтар уонна кырдьаҕастар интернаттарын олохтоохторо уонна «Алгыс» түмсүү ветераннара.
Тэрээһини хомус алыптаах доҕуһуолунан, сахалыы тылынан олус иһирэхтик иилээн-саҕалаан тэрийээччилэр арыйдылар. Оҕолорго олоҥхо диэн тугуй, сүрүннээн кини суолтатын, туохтан турарын уонна олоҥхоһуттар тустарынан кэпсээтилэр. Салгыы Депутатскайдааҕы музыка уонна искусство оскуолатын фольклор салаатын оҕолоро кылгастык П.А.Ойуунускай суруйан хаалларбыт «Дьулуруйар Ньургун Боотур» олоҥхотуттан быһа тардан нуучча тылынан толордулар.
Маны сэргэ, «Дьулуруйар Ньургун Боотур» олоҥхону РСФСР, Саха АССР үтүөлээх, норуодунай артыыһын, РСФСР Суруйааччыларын союһун чилиэнин, П.А. Ойуунускай аатынан Государственнай бириэмийэ лауреатын, уһуйааччы ГАВРИИЛ ГАВРИЛОВИЧ КОЛЕСОВ ааҕарын иһиттибит уонна олоҥхо ис хоһоонун кэпсиир презентацияны көрдүбүт.
Фольклор кылааһын кыра бөлөҕө “Күн Сыдьаайа” Калиста Пахомова мелодиятыгар “Чороон” диэн ырыаны ытыс тыаһынан ыллаатылар.
Хомуска сыыйа тардыы ньыматын туһунан бэйэтин уопутун кэпсииригэр тыл бэрилиннэ музыка уонна искусство оскуолатын фольклор салаатын салайааччытыгар Евдокия Семеновна Васильеваҕа. Кини сахалартан бастакынан хомус тыаһын Бүтүн Союз түһүлгэтигэр таһаарбыт, хомуһү дьоҥҥо-сэргэҕэ биһирэтэн киэҥ эйгэҕэ тахсарыгар улахан үтүөлээх-өҥөлөөх Лука Николаевич Турнин туһунан сүрдээх үчүгэй сырдатыыны оҥордо. Лука Николаевич Турнин — Саха АССР культуратын үтүөлээх үлэһитэ, “Үлэ Кыһыл Знамята” орден кавалера, тыыл бэтэрээнэ республикаҕа уус-уран самодеятельноһы сайыннарыыга улахан кылааттааҕын бэлиэтээтэ. 17 сыл тухары Томпо, Үөһээ Дьааҥы, Саккырыыр, Усуйаана оройуоннарыгар төрүт олохтоох норуоттар култуураларын сөргүтүүгэ улаханнык үлэлэспит умнуллубат үтүөлээх буоларын санатта. Ол курдук, кини Хаһааччыйа культуратын дьиэтин методиһынан үлэлээбитэ. Онон хоту үлэлээбит буолан, аҕыйах ахсааннаах омуктар ырыаларын ыллаабыта-туойбута. Манна мустубут дьон Турнин бэйэтэ хомуска толорон хаалларбыт эбээннии «Һээдьэтин» иһиттибит.
Евдокия Васильева бэйэтэ эмиэ оҕолору Турнинныы сыыйа тардыыга үөрэтэр, онон кини “Күн сыдьаайа” ансамбылын оҕолоро хомуска сыыйа тардыыны толорон дьон сэҥээриитин ыллылар.
Онтон көрөөччүлэр болҕомтолоругар Депутатскайдааҕы оҕо искусствотын оскуолатын фольклор кылааһын выпускниктара, Аан дойдутааҕы, Бүтүн Россиятааҕы, республикатааҕы, улуустааҕы фестиваллар кыайыылааахтара уонна Үөһээ Бүлүүгэ 2022 сыллаахха ыытыллыбыт Республикатааҕы Олонхо ыһыаҕын хомус күрэҕин кыайыылаахтара, Кореяҕа аан дойдутааҕы музыкальнай оскуола үөрэнээччилэрин икки ардыларыгар ыытыллыбыт күрэх 3 бириистээх миэстэҕэ тиксибит «Үрдэл» ансамбль кыттыылаахтара: Данияра Джанкабулова, Вася, Слава Голиковтар толорууларыгар «һээдьэ»-былыргылыы сыыйа тардыыны видеоҕа көрдүбүт.
Бүтүн аан дойдутааҕы, республикатааҕы, улуустааҕы хомус күрэҕин кыайыылаахтара, бу соторутааҕыта Кытай Харбин куоратыгар ыытыллыбыт Бүтүн аан дойдутааҕы фестиваль «Звезды Харбина» конкурс кыайыылаахтара Варя Горохова, Карина Копырина толорууларыгар «Оһуордар» — хамсаныылаах сыыйа тардыыны толорон бэлэхтээтилэр.
Залга мустубут ыалдьыттар фольклор салаа оҕолорун толорууларын көрөн-истэн хайҕаатылар.
Түмүккэ эттэххэ, өбүгэлэрбит үс түүннээх күнү быһа, устар ууну сомоҕолуур олоҥхоһут олоҥхотун истээри ыраахтан-чугастан түөлбэлээн түмсэллэрэ. Олоҥхо истэр дьоро киэһэ саха киһитигэр дьолу саҕар диэн мээнэҕэ эппэттэхтэрэ чахчы. Онон, олоҥхону үөрэтэн, интэриэһинэй тэрээһиннэри ыытан, төрөппүтү, оҕолору сэҥээртэххэ, төрөөбүт төрүт тылы ылыныылара, араас эйгэҕэ таба туттуулара, дириҥник толкуйдуур, ыраастык саҥарар дьоҕурдара сайдыа этэ.
