«Дьөһөгөй айыы – сылгы таҥарата»
Кулун тутар 21 күнэ — Саха Өрөспүүбүлүкэтигэр Сылгыһыт күнэ. Бу күн СӨ бэрэсидьиэнин N 1373 Ыйааҕынан 2016 сыл атырдьах ыйын 17 күнүгэр олохтоммута.
Саха сылгыһытын үлэтэ сыралаах, элбэх тоҥуулаах – хатыылаах, уустук үлэ буолар. Кини куруук ыраах сиргэ сылдьан үлэлиир, айылҕа мэһэйдэрин да толлубакка сыралаах үлэтин түмүктүүр, ситиһэр сыалтан элбэх эрэйи көрсөр. Сылгыһыт бэйэтин мындыр өйүнэн, сатабылынан сылгыларын ханна да тиийбиттэрин булан аҕалар, өлгөм оттоох мэччийэр сирдэри табатык булан сылгыларын аһыыр сирдэрин булар. Маны таһынан сылгыһыт бэйэтэ учугэй булчут буолуон наада. Адьырҕа кыыллартан: бөрөттөн, эһэттэн сылгыларын харыстыахтаах.
Сахаларга дьөһөгөй оҕото былыр-былыргыттан таҥараҕа тэҥнээх этэ. Ону республикабыт гербата туоһулуур. Онно саха урааҥхай киһитэ аты миинэн олоро ойууламмыт. Саха сылгытын боруодата айылҕаттан тулурдаах, күүстээх. Кини биһиги уһун бытарҕан тымныыбытын тулуйан, халыҥ хаары хаһан аһын булунан аһыыр.
Сылгы саха киһитигэр эрэллээх доҕоро, көлөтө буолар. Саха сылгытын этэ, сыата олус иҥэмтиэлээх, эмтээх буолар, тириититтэн уонна тыһыттан бөҕө ичигэс таҥас оҥороллор, сылгы биэтиттэн кымыһы ылаллар. Онон сылгыһыт түбүктээх үлэтиттэн сылгы төрөлкөй, этэ-сиинэ ситэр, чөл туруктаах, ууһуур, сайдар кэскиллээх буолар. Хас биирдии сылгыһыт сыала-соруга: сылгыны иитии, улаатыннарыы уонна ахсаанын элбэтии буолуохтаах.
Бу күҥҥэ Үлэ сылын чэрчитинэн сылгыһыттарга аналлаах «Дьөһөгөй айыы – сылгы таҥарата» диэн ааттаах кинигэ выставката киин библиотекаҕа турда.
Кэлиҥ, сылдьыҥ, кинигэтэ ааҕыҥ, уларсыҥ!