Ийэ тыл, сурук-бичик күнүгэр уонна өрөспүүбүлүкэҕэ Оҕо саас сылыгар аналлаах «Бастыҥ буочар» кыраһыабай буочарга аһаҕас куйаар ситимин нөҥүө күрэс балаһыанньата.
Буолар – күнэ – дьыла: олунньу 5-14 күннэрэ.
Тэрийээччи: Депутатскай бөһүөлэгин киин библиотеката.
Күрэс ирдэбиллэрэ:
- Күрэскэ 18-тан үөһээ саастаах ким баҕалаах кыттар.
- Бэриллибит тиэкиһи көрөн олорон саамай кыраһыабай буочарынан устан ылаллар.
- Сайаапкаҕа ааттарын, саастарын, ханна олороллорун, төлөпүөннэрин нүөмэрин толору ыйаллар.
- Сайаапканы уонна үлэлэри хаартыскаҕа түһэрэн deputbiblioteka@mail.ru электроннай аадырыска ыыталлар.
- Күрэскэ кыттыы босхо.
Түмүк олунньу 15 күнүгэр МКУ «Усть-Янская МЦБС» сайтыгар уонна Вконтакте сообществотыгар тахсар.
Наҕараадалааһын:
1,2,3 миэстэни ылбыттар дипломнарынан наҕараадаланыахтара. Бары кыттааччыларга туоһу суруктар туттарыллыахтара.
Күрэс тиэкиһэ Далан «Дьикти саас» айымньытыттан быһа тардыы.
Биһиги кылааспыт уолаттарын кытта мин көрүдүөр уһугар турабын. Испэр Айтаны кэтэһэбин да, бүгүн хойутаата, биллибэт. Маарыын Ванялыын ааһан иһэн көрдөхпүнэ, дьиэлэрин таһыгар ким да суоҕа. Ыстапаан эрдэ туран үлэтигэр барбыт быһылааҕа, оһохторун буруота чуумпу халлааҥҥа көбүс – көнөтүк тыргыйара.
Айта Бархатова – үчүгэй кыыс. Кини быйыл күһүн куорат эҥэриттэн кэлбитэ. Ийэтэ Мария Михайловна биһиги шефтэһэр үһүс кылааспытын үөрэтэр. Аҕата суох, бадаҕа, өлбүт.
Мин санаабар, дьон бары икки суолга хайдаллар: кинигэни ааҕааччылар уонна аахпаттар. Айта маҥнайгыларга киирэр. Ол иһин хара бастакыттан тапсыбыппыт.
Аан маҥнай билсиһиибит да библиотекаттан саҕаламмыта. Сайын от үлэтин үгэнигэр, өйүөм бүтэн, биир киэһэ атынан дьиэбэр тэбилиннирэн кэлбитим. Мин баттахпын үүннэрэн, саппыкыбын тиэрэн, ырбаахыбын нэлэккэйдэнэн баран, эҥэрдэринэн курданардыы баанан, буспут-хаппыт, сирэлийбит-боролуйбут үлэ киһитин героическай мөссүөнүн мөссүөннэнэн, тиэтэл бөҕөнөн библиотекаҕа көтөн түспүтүм.