Депутатскайдар Өксөкүлээх Өлөксөй төрөөбүтэ 146 сылын көрсө
Республиканскай акцияҕа кытыннылар
Ил Дархан Айсен Николаев уурааҕынан 2023-2027 с.с. Республика үрдүнэн Кулаковскай сылларынан биллэриллибитэ.
Биһиги чулуу киһибит, А. Е. Кулаковскай — Өксөкүлээх Өлөксөй саха биллиилээх поэта, айар тылбыт аҕата, учуонайа, сырдатааччыта, саха литературатын төрүттээччитэ, фольклориһа, бөлүһүөгэ быйыл кулун тутар 16 күнүгэр төрөөбүтэ 146 сылын бэлиэтээтибит. Бу күн Республика үрдүнэн «Өксөкүлээх сардаҥата» акцияҕа Депутатскай олохтоохторо эмиэ кыттыстыбыт. Акция киин библиотекаҕа үрдүк тэрээһиннээхтик ыытылынна.
Өксөкүлээх Өлөксөй хоту сирдэри кэрийэн советскай былааһы олохтоспута, дьон общественнай өйүн-санаатын салайсыбыта, сайыннарбыта, сырдыкка – кэрэҕэ, үөрэххэ сирдээбитэ. Чуолаан, биһиэхэ Усуйаана улууһа сайдарыгар бэйэтин кылаатын киллэрбитэ сүҥкэн. Манна кэлэн олохтоох дьон саҥарар саҥаларын уратытын, кэпсээннэрин, ырыаларын – хоһооннорун, абыычайдарын суруйан, үөрэтэн, сурукка – бичиккэ хаалларбыта.
Акцияҕа Культура уонна духуобунай сайдыы үлэһиттэрэ, оройуон баһылыгын солбуйаачы Кычкин Андрей Егорович, физическэй культура, спорт уонна социальнай политика комитетын кылаабынай специалиһа Солдатова Акулина Петровна, Депутатскайдааҕы оҕо искусствотын оскуолатын үөрэнээччилэрэ, «Алгыс» кулууб түмсүүтүн кыттыылаахтара кэлэн көхтөөхтүк кытыннылар.
Акция чэрчитинэн эрдэттэн ааҕар саалаҕа А. Е. Кулаковскай — Өксөкүлээх Өлөксөй олоҕугар, айымньыларыгар аналлаах «А.Е.Кулаковскай уус-уран уонна научнай нэһилиэстибэтэ» диэн ааттаах кинигэ выставката турда. Ааҕааччылар болҕомтолоругар Өксөкүлээх Өлөксөй уус-уран айымньылара, кини научнай үлэлэрэ, «Саха интеллигенциятыгар суруга», ону сэргэ суруйааччы олоҕун уонна айымньытын туһунан чинчийээччилэр үлэлэрэ көрдөрүүгэ ууруллубут. Тэрээһин саҕаланыытыгар кэлбит ыалдьыттарга Кулаковскай туһунан тэттик видео-презентация көрдөрүлүннэ уонна диктант ыытылынна. Маны сэргэ алыптаах хомус доҕуһуолугар Өксөкүлээх Өлөксөй «Хомус» хоһооно ааҕылынна, «Байанай алгыһа» ырыатын, «Сүбэ», «Төрүөбүт соругум» айымньыларын, «Ойуун түүлэ» филосовскай ис хоһоонноох поэматыттан быһа тардыыны, «Саха интеллигенциятын» суругуттан ааҕыыларын сэҥээрэ иһиттибит, ахтан – санаан ыллыбыт уонна анал чүмэчи уматтыбыт.
Түмүккэ, Алексей Елисеевич дириҥ суолталаах үлэтэ, сахатын дьонугар кини сүбэлэрэ сүппэккэ үйэттэн үйэҕэ салҕанан бара туруо диэн этэн туран, сахабыт тыла сайда турарыгар, инники көлүөнэбит үөрэхтээх, сайдыылаах буоларын туһугар Өксөкүлээх Өлөксөй эдэр дьоҥҥо анаабыт «Оттоку олук алгыһыттан» быһа тардыыны санаан ылыахха:
Нуучча ньургунун кытта
Туруулаһар доҕор буол,
Саха талыытын кытта
Самдайдаһар атас буол,
Үрдүк үөрэхтээхтэри кытта
Өйөнсөн үөскээ,
Бэрт мэйиилээхтэри кытта
Тэҥнэһэн сэһэргэс.