Саҥа кинигэлэргэ обзор
Депутатскайдааҕы киин библиотека эһиэхэ анаан саҥа кинигэлэри билиһиннэрэр. Манна сахалыы уус-уран айымньылары сэҥээрэн ааҕар дьоннорго араас темаҕа кинигэ эгэлгэтэ дьаарыстанна.
Ангелина Данилова «Кимиэхэ да кэпсэммэтэх кэпсээн» (16+)
Киһи олоҕо быстах түгэнтэн тосту уларыйыан сөп дуо? Эбэтэр хас биирдии киһи олоҕо бэйэтиттэн эрэ тутулуктаах дуу? Биир сыыһа-халты туттууттан буруйа суох дьон олоҕо алдьанарын, биир тылынан өлөн эрэр киһини өрүһүйүөххэ сөбүн бу кинигэҕэ киирбит айымньылартан ааҕан итэҕэйиэххит. Олох чэпчэкитэ суоҕун, ол эрээри олус күндүтүн, кэрэтин, ону тэҥэ күннээҕи олохпутугар көрсөр көрдөөх түгэннэри тэттик кэпсээннэртэн билиэххит, сэргэхсийиэххит.
Николай Босиков «Эн онно хайаан да тиий» (16+)
Талааннаах суруйааччы Николай Босиков айымньыларын хомуурунньугар хайа да кэмҥэ суолтатын сүтэрбэт уопсастыба күннээҕи кыһалҕата, сиэрэ-майгыта, уоллаах кыыс туҥуй маҥнайгы тапталлара, киэҥ-нэлэмэн Сахабыт сирин кэрэ айылҕата олус бэргэнник, судургу тылынан сэһэргэнэр.
Антонина Саввинова «Төлкөм миэнэ» (1, 2 чаастара) (16+)
Киһи санаатын, дьылҕатын өтө билэр, ааспыты, билиҥҥини, кэлэри ситимнээн бүтэйдии көрөр дьикти дьоҕурдаах, айылҕа ыытар сырдык күүһүнэн ыраахтан да эмтиир сатабыллаах – бу норуот эмчитэ Антонина Трофимовна Саввинова.
Айымньы сүрүн геройа Антонина тапталлаах ийэтин сүтэрэн, оҕо сааһыттан тулаайах хаалан, дьон хаҕыс, тоҥуй сыһыанын билэн, оҕолуу ыраас, күүстээх санаатынан салайтаран, дириҥ толкуйунан тобулан, киэҥ-холку майгытынан олох очурдарын этэҥҥэ туораан, өбүгэтиттэн утумнаабыт сүдү күүһүн көмөтүнэн өлөр өлүүттэн өрүһүнэн, дьиҥ уустук олоҕо уус – ураннык ойууланар.
Любовь Готовцева «Эдьиий, биһиги тыыннаахпыт» (12+)
Бу кинигэттэн Анаабыр киэҥ куйаарыгар алта күннээх түүн аһа – таҥаһа суох муммут дьон Дьылҕа Хаан ыарахан тургутуутун хайдах ааспыттарын сиһилии билиэҕиҥ.
Тумарча «Алмаас уонна көмүс кистэлэҥнэрэ» (12+)
Тумарча историческай – документальнай хабааннаах сэһэннэригэр Саха сиригэр алмаас көрдөөһүнүн бастакы сылларын, көмүс кистэлэҥин, эспэдииссийэ сыралаах үлэтин туһунан баар чахчыларга олоҕуран суруйар. Күндү таастары көрдөөһүн, булуу араас ыарахаттары , олох эриирин – мускуурун, хорсун быһыыны эрэйэр. Ааптар киһи киһиэхэ сыһыанын, үлэҕэ бэриниилээх буолууну, олох очурдарын ырылхайдык арыйар.
Кистэлэҥнээх Саха сирэ: дьулаан көстүүлэр, дьикти сирдэр (16+)
Кутталлаах түбэлтэлэри кэпсэтэргин сөбүлүүгүн дуо? Киэҥ нэлэмэн Сахабыт сирэ ситэ чинчийиллибэтэх муннугаөссө да элбэх, дьон эҥин араас дьиктини, наука кыайан быһаарбатах көстүүлэрин түбэһэ көрөрө баар суол.
Бу кинигэттэн чучунаа, чөчүөккэ, сүллүүкүн, онтон да атын амырыын күтүрдэр, дьулаан көстүүлэр уонна таайыллыбатах дьикти сирдэр тустарынан билиэҥ. Ону сэргэ киһи этин сааһын аһар үһүйээннэри, номохтору уонна дьиҥ олоххо буолбут түбэлтэлэри ааҕыаҥ.
«Кистэлэҥнээх Саха сирэ: дьулаан көстүүлэр, дьикти сирдэр» таайыллыбатах эйгэ быыһын эйиэхэ сэгэтиэ.
Уйан уйулҕалаах киһи ааҕара бобуулаах.
Күндү ааҕааччыларбытын күүтэбит! Кэлиҥ, сылдьыҥ, ааҕыҥ!