Олунньу ый 14 күнүгэр оройуоннааҕы кииннэммит библиотека ааҕар саалатыгар, төрөөбүт тыл уонна сурук-бичик күнүн чэрчитинэн таба суруйары чиҥэтэр сыаллаах сахалыы тылынан дьыктаан ыытылынна. Быйылгы дьыктааҥҥа Улуу Кыайыы 80 – сылын көрсө, Саха сиригэр Ийэ дойдуну, Россияҕа Аҕа дойдуну көмүскээччилэр сылларыгар анаан, саха фронтовик суруйааччыта Тимофей Сметанин «Кыайбыттар ыһыахтара» айымньытыттан быһа тардыыны суруйдулар. Манна барыта холбоон 30 киһи кыттыыны ылла.
Тэрээһин Депутатскайдааҕы оҕо искусствотын оскуолатыгар (салайааччы: Васильева Е.С.) фольклорнай салааҕа үөрэнэр кыра уонна улахан бөлөх оҕолорун эҕэрдэ нүөмэрдэриттэн саҕаланна. Оҕолор саха төрүт дорҕооннорун хомуска дьиэрэтэн иһитиннэрдилэр, норуот ырыатын күпсүүр доҕуһуолугар бэркэ ыллаатылар.
Дьыктааны улуустааҕы үөрэх салалтатын специалиһа Екатерина Михайловна Оконешникова аахта. Бэрэбиэркэ түмүгүнэн, 1 киһи «Бастыҥтан бастыҥ суруксут», 4 киһи «Бастыҥ суруксут», 8 киһи «Үчүгэй суруксут» ааты ыллылар. Кыттааччылар бука бары ааҕыы-суруйуу үөрэҕин таһымын бигэргэтэр туоһу уонна хайҕабыл сурук туттулар.
Сылтан сыл аайы төрөөбүт тылга умсугуйар, дьыктааны таба суруйар дьон таһыма элбээн иһэрэ киһини үөрдэр. Бары кыттыбыт дьоҥҥо барҕа махталбытын биллэрэбит.
Сахалыы сайаҕастык саҥарар, иэйиибитин истиҥник этинэр Ийэ тылбыт сүппэккэ үүнэ сайда турдун!
