Атырдьах ыйын 19 күнүгэр «Наследие» оройуоннааҕы киин библиотека иһинэн тэриллибит музейга айар куттаах киһибит – Ирина Абрамованы кытта көрсүһүү буолан ааста.
Ирина Васильевна Дьокуускайдааҕы тыа хаһаайыстыбатын техникумун уус – уран салайааччыта, Саха Республикатын үтүөлээх үлэһитэ, Саха Республикатын тыа хаһаайыстыбатын туйгуна, Саха Республикатын культуратын туйгуна, Саха Республикатын мелодистарын союһун чилиэнэ, Усуйаана улууһун бочуоттаах олохтооҕо буолар.
Быйыл муус устар ыйга Ирина Васильевна 75 сааһын төрөөбүт Туматын сиригэр бэлиэтиир өрөгөйдөөх үбүлүөйүн уонна култуура эйгэтигэр үлэлээбитэ 50 сылын ис сүрэхтэн үөрэн туран бэлиэтээбиттэрэ. Оттон 2-с сырыытыгар, биһиэхэ Депутатскайга чопчу биир сыаллаах кэллэ. Ол курдук, Ирина Васильевна наҕараадаларын, хаартыскаларын, онтон да атын бэйэтин тус малын музейга аҕалан туттарда.
Бу күн киниэхэ элбэх истиҥ тыллар ананнылар, бэлэхтэр туттарылыннылар, сэргэстэһэ олорон уруккуну – хойуккуну ахтыһыы буолла. Ирина Васильевна сонунун кэпсээтэ, бэйэтин айбыт элбэх ырыаларын билиһиннэрдэ. Ол курдук, сахабыт дьонун маанылаах аһа — алаадьы туһунан «Күн төгүрүк алаадыта» уонна хотугу кыраай көмүс хатырыктаах чыыр балыгын туһунан «Чыыр балык», «Оҕо сааһым биһигэ — Туматым» ырыаларын ыллыырыгар көрдөстүбүт. Ирина Васильевна наҕыл куолаһынан ырыатын ыллаатаҕын аайы, бары ытыс тыаһынан үөрүүбүтүн биллэрдибит.
Тэрээһин өрө көтөҕүүлээхтик ааста, оттон кыттыыны ылбыт дьон махтанан, астынан бардылар.
