Саха сиригэр Булчут күнүн муус устар ый бастакы субуотатыгар бэлиэтиибит. Бу күн хас да үйэни уҥуордаан кэлбит булчут өбүгэлэрбит үтүө үгэстэригэр сүгүрүйүүнү, айылҕаҕа харыстабыллаах сыһыаны көрдөрөр (https://ulus.media/2023/03/31/bulchut-kynynen-turgutugu-taaj/ ).
Оттон муус устар ый бастакы өрөбүлэ — Аҕалар күннэрэ. Саха Сирин бастакы Президена М.Е. Николаев 1999 сыл олунньу 15 күнүнээҕи 685 №-дээх «Аҕалар күннэрин олохтооһун туһунан» Ыйааҕыгар олоҕуран, муус устар бастакы өрөбүлэ Аҕалар күннэринэн биллэриллибитэ. Бу бырааһынньык олохтонуута дьиэ кэргэн уонна уопсастыба иннигэр аҕа суолтатын үрдэтии, кини дьиэ кэргэн олоҕор, тускутугар уонна үүнэр кэнчээри ыччакка дьоһунун, сүдү оруоллааҕын туоһута буолар. Аҕалар күннэрин кэрэһилээн, Саха Республикатын Вице-президенын 2002 сыл кулун тутар 22 күнүнээҕи 30—ВП №-дээх Дьаһалынан «Ытык аҕа» Бэлиэ олохтоммута. Бу Бэлиэнэн хас сыл аайы, муус устарга, үс элбэх оҕолоох аҕалар кэнчээри ыччаты иитиигэ-үөрэтиигэ ситиһиилэрин, дьиэ кэргэн тутулун бөҕөргөтүүтүн уонна аҕа оруолун уопсастыбаҕа үрдэтиитин иһин наҕараадаланаллар. Бу Күн бүтүн республика үрдүнэн араас спортивнай күрэхтэһиилэр, аҕаларга анаммыт тэрээһиннэр ыытыллаллар (https://sah.wikipedia.org/wiki/Аҕалар_күннэрэ).
Муус устар маҥнайгы күннэрин баттаһа улуустааҕы киин библиотека биһиги аҕаларбытыгар, булчуттарбытыгар анаан «Уруй-айхал аҕаларга!» диэн ааттаах кинигэ выставкатын туруорда.
Выставкаҕа бастакы икки полканы толору булчуттарга, балыксыттарга аналлаах «Байанай» сурунаал уурулунна. Ону таһынан биографическай, историческай, документальнай суолталаах нууччалыы кинигэлэр бааллар.
Аҕалары, булчуттары э5эрдэлээн туран бу күннэргэ кинигэ выставкатыгар күүтэбит.
Кэлиҥ, сылдьыҥ, кинигэтэ, сурунаалла уларсыҥ!
