Төрөөбүт тыл, сурук-бичик күнүн чэрчитинэн, олунньу 18 күнүгэр Депутатскай бөһүөлэгин олохтоохторо Киин библиотекаҕа тэриллибит «Сахалыы диктаҥҥа» кэлэн көхтөөхтүк кытыннылар, билиилэрин тургутан көрдүлэр.
Быйылгы «Сахалыы диктант» акция саха маҥнайгы советскай интеллигенциятын биир ча5ылхай бэрэстэбиитэлигэр, сахаттан биир маҥнайгы тыл уерэхтээҕэр, тюрколог, суруйааччы Гавриил Васильевич Баишев – Алтан Сарын төрөөбүтэ 125 сылыгар ананна.
Тэрээһин хомус алыптаах дорҕоонунан уонна Күндэ «Төрөөбүт тыл» диэн хоһоонунан саҕаланна. Кыттааччылар саха тыла хайдах сайдыбытын, Гавриил Васильевич Баишев – Алтан Сарын олоҕун туһунан ахтыылары иһиттилэр уонна С.А. Новгородов «Сахалыы сурук — бичик» репринтнэй алфавитын тутан – хабан, ааҕан көрдүлэр.
Диктант текстынан Гаврил Баишев – Алтан Сарын «Киэһээ айан» диэн «Тоҕус этиҥ тойуга» диэн хомуурунньугуттан быһа тардыы талыллыбыт. Диктааны аахта саха тылын учуутала Күннэй Сергеевна Слепцова.
Текстка элбэх уус – уран ойуулааһын туһаныллыбыт, автор орфографията оннунан хаалла, ол курдук, билигин биһиэхэ туһаныллыбат тыллар бааллар: «курдук/көрдүк, «кытта/гытта» уонна да атыттар.
Бу тэрээһиҥҥэ уопсайа 14 киһи кэлэн кытынна.