Ахсынньы 24 күнүгэр Депутатскай бөһүөлэгэр улуустааҕы библиотечнай ситим 90 сааһын бэлиэтиир тэрээһиннэр чэрчилэринэн олохтоох суруйааччы Николай Слепцов-Чондон 90 сааһыгар аналлаах литературнай киэһэ буолан ааста.
Тыыл, үлэ, коммунистическай партия бэтэрээнэ, Саха Республикатын суруйааччыларын сойууһун чилиэнэ, СР Норуотун хаһаайыстыбатын үтүөлээх үлэһитэ, Усуйаана оройуонун Бочуоттаах олохтооҕо, «Гражданскай килбиэн” бэлиэ хаһаайына, поэт, прозаик, хас да кинигэ, норуот таптаан ыллыыр ырыа тылларын ааптара Николай Егорович Слепцов – Чондон тыыннааҕа буоллар ахсынньы 20 күнүгэр 90 сааһын томточчу туолбут буолуохтаах этэ. Бастакы суруйааччы, прозаик Кини кинигэлэрэ — «Туундара сибэккитэ», «Дойдум дьоно», «Саҥа олох», «Көмүөл» — Усуйаана улууһун историческай чахчыларыгар олоҕурбут буолан, бу айымньылары аахтахха оройуон урут хайдах олорбутун, туох-ханнык дьон олорон кэлбитин билиэххэ сөп. “Кини төрөөбүт сирин былыргы олоҕун, айылҕатын, олорон ааспыт дьонун-сэргэтин, буолбут событиелары уустаан-ураннаан ойуулуур. Айымньы геройдарын прототиптара — билиҥҥи дьон удьуордара-сыдьааннара, төрүттэрэ буолан, ааҕааччылары ордук умсугутар, болҕомтону тардар”, — диэн суруйар краевед Николай Попов-Күндүлүн.
Дьоро киэһэ саҕаланыытыгар Депутатскайдааҕы искусство оскуолатын дьүрүскэн тыастаах “Күн сыдьаайа” ансаамбыл кэрэчээн кыргыттара хомуска оонньоон тэрээһини өрө көтөҕүүлээхтик арыйдылар.
Депутатскайга суруйааччы Николай Слепцов-Чондон юбилейыгар анаммыт көрсүһүү буолан ааста. Ыытааччылар Анна Никулина уонна Диана Дохунаева Николай Егорович биографиятын, олоҕун кэрчиктэрин билиһиннэрдилэр. Салгыы кинини кытта өр сыллары быһа бииргэ алтыспыт, доҕордоспут, хоһоонньут, суруналыыс, Бэчээт туйгуна Татьяна Протопоповаҕа тыл бэрилиннэ. Татьяна Афанасьевна сүрүннээн Слепцов-Чондон устудьуоннуур сылларын, суруйар талаана хайдах арыллан испитин, Депутатскайга общественнай үлэтин туһунан сырдатта, “Хоһуун” сэһэн илиинэн суруйуутун компьютерга бэчээттээбит киһи быһыытынан Николай Егоровичтыын өрөбүл күн диэн аахсыбакка элбэхтик алтыспыттарын кэпсээтэ. Депутатскайга суруйааччы Николай Слепцов-Чондон юбилейыгар анаммыт көрсүһүү буолан ааста
Салгыы “Саха” национальнай көрдөрөр-иһитиннэрэр ханаал “Заполярье” Усуйаанатааҕы филиала 2008 сыллааҕы архивнай видеотын көрдөрдүлэр. Николай Егорович 2008 сыл түмүгүн анааран көрүүтэ кэрэхсэбиллээх буолла. Ити саҕана кини улуустааҕы “Знание” общество бэрэссэдээтэлинэн таһаарыылаахтык үлэлии-хамсыы сылдьыбыта. Киэҥ билиилээх, сыта-олоро арааһы толкуйдуур, политическай боппуруостары интэриэһиргиир киһи ол саҕанааҕы аан дойдутааҕы балаһыанньаны олус сөпкө бары өттүттэн көрөн дьоҥҥо-сэргэҕэ тиэрдибит диэн түмүккэ кэлэҕин.
Онтон балта Анна Слепцова аймахтыы сыһыаннарын туһунан кэпсээтэ, Николай Егорович уонна кэргэнэ Мария Прокопьевна ыалдьытымсахтарын, элэккэйдэрин, аймахтарыгар, дьоҥҥо-сэргэҕэ төһө кыалларынан көмөлөһө сатыылларын ахтан ылла. Уопсайынан, суруйааччы Николай Чондон Слепцовтар киэҥ уруу-аймах биир аксакаллара, сүбэһиттэрэ-амаһыттара, убайдаатар убайдара, киэн туттар киһилэрэ этэ.
Депутатскайга суруйааччы Николай Слепцов-Чондон юбилейыгар анаммыт көрсүһүү буолан аастаТумат библиотекатын үлэһитэ Елизавета Горохова Николай Слепцов доҕоро, суруйааччы Николай Попов-Күндүлүн суруйбут ахтыытын кинигэттэн быһа тардан аахта.
“Николай педагогическай училищеҕа үөрэнэр сылларыгар общественнай улэҕэ көхтөөхтүк кыттара, элбэх оҕону кытта билсибитэ. Намтан сылдьар, кэлин талааннаах поэт буолбут Н.М. Рыкуновтуун бииргэ үөрэммитэ, доҕордуу буолбуттара. Кинилэри саха тылыгар үөрэтэр учууталлара, биллиилээх поэт, литературнай критик Е.П. Шестаков-Эрчимэн салайар литературнай куруһуогун актыыбынай чилиэннэринэн этилэр. Сотору-сотору сүрүйааччылардыын көрсүһэллэрэ”, — диэн суруйар Николай Иннокентьевич Попов.
Депутатскайга суруйааччы Николай Слепцов-Чондон юбилейыгар анаммыт көрсүһүү буолан ааста
Салгыы “Далбар хотун” ансаамбыл кыттыылаахтара уонна ырыа тылын, матыыбын билэр литературнай киэһэ ыалдьыттара “Сомондоон” ырыаны ыллаан дьиэрэттилэр.
Түмүккэ библиотека директора Туйара Семенова Николай Егорович общественнай үлэтин туһунан кэпсээтэ. Уонтан тахса сыл анараа өттүгэр улууска общественнай хамсааһын сайдарыгар, нэһилиэнньэ түмсэригэр олук уурбут, улахан өҥөлөөх киһи этэ диэн тоһоҕолоон бэлиэтээтэ. Кини инициативатынан Хаһааччыйаҕа, Сайылыкка, Тумакка, Хайырга дьахтар советтара, бэтэрээннэр кулууптара, арчы дьиэлэр биирдии-биирдии аһыллан, нэһилиэктэргэ үлэ саҕаламмыта.
Депутатскайга суруйааччы Николай Слепцов-Чондон юбилейыгар анаммыт көрсүһүү буолан ааста
Литературнай ахтыы киэһэҕэ кэлбит дьон иһирэх сэһэргэһииттэн, санаа атастаһыытыттан сүрдээҕин дуоһуйан, астынан тарҕастылар. Николай Егорович Слепцов – Чондон киһи, үлэһит, суруйааччы, общественник быһыытынан усуйааналарга үтүө өйдөбүлү хаалларбытын бэлиэтээтилэр.
Мирослава Федотова